راجل للبيع مين يشتري؟؟؟؟؟؟؟؟؟؟؟؟؟؟

راجل للبيع ........ مين يشترى ؟
ده النتيجه اللى وصلها سوبر مان اللى انا هاحكي ليكم حكايته دلـوقتـى! .
سوبر مان ده ياسيدى واحد مش موجود يعنى مش انا ولا انت ولا اى حد تانى لأنه ببساطه شخصيه مثاليه فى كل حاجة وبالأخص الأ خذ بالأسباب زى ما بيقولوا لينا خد بالأسباب وربنا يوفقك ) .
المهم سوبر مان ده كان ناجح طول حياته الى اقصى درجه ممكن بشر يحققها لكن عيبه الوحيد انه كان راجل عاوز يعتمد على نفسه.
المهم دخل الثانويه العامه وطلع الأول على الجمهوريه ( مش بقولك سوبر مان بقى ) وخد مكافأه من منى فى برنامج العاشره مساءا عشر آلاف جنيه ودخل طب عين شمس وطبعا كلنا عارفين اسعار الكتب , المهم كان كل سنه بيطلع الاول على الدفعه وطبعا الفلوس خلصت على دراسته فى الست سنين .
وطبعا هو الاول على الدفعه عشان كده اتعين فى الكليه ولقى مرتبه 260 جنيه فى الشهر . وبعدين قرر يعمل دراسات عشان ياخد بالاسباب وطبعا مادام هو متعين فى الكليه يعنى هيعمل الدراسات ببلاش . المهم حضر الماجيستير ونجح فيه وطبعا كلنا عارفين انه اتخرج وهو عنده 25سنه وفضل سنتين فى الماجيستير يعنى هو دلوقتى عنده 27 وبعد كده قرر يحضر الدكتوراه بس لازم يفضل سنه بعد الماجستير وبعد كده الدكتوراه خدت منه 3 سنين كمان يعنى هو دلـوقتـى! عنده 31 سنه ( انا باكلم على سوبر مان مش واحد عادى ) .
وبعد لما اخد الدكتوراه اترقى فى الكليه وبقى استاذ مساعد يعنى دلوقتى بيقبض 500 جنيه . وده كان اول مرتب يبدأ يحوشه وهو عنده 31 سنه , اصله ناوى يكون مستقبله بقى ويعيش حياته , وفى يوم راح يسأل دكتور كبير فى الكليه عن اقصى مرتب فى الوظيفه ده , قاله بص يابنى انا دلوقتى عندى 55 سنه فى الكليه ده وانا دلـوقتـى! رئيس قسم ومرتبى 5000 جنيه !!!!!
المهم سوبر مان مش يئس وقرر يكمل مستقبله ويحط القرش على القرش ويبنى مستقبله , وبعد سنين كتيره حوش 25 الف جنيه وكان عمره 38 سنه ومش هاقولك هو بقى كان مبسوط ازاى بالثروة اللى كونها !!!!!!!!
فقال بقى لازم اكمل نص دينى وراح يتقدم لبنت الجيران اللى كان بيحبها بينه وبين نفسه بس , وأول كلمه بابا العروسه قالهالوه :بص يابنى اخت العروسه جت ليها شبكه بعشرين الف جنيه وهى مش اقل من اختها !!!!!!!!
طبعا سوبر مان سمع الكلمتين دول وقال لأبو العروسه ( فرصه سعيده ياعمى انا صرفت نظر عن الجواز !!!!!!! )
وسوبر مان روح البيت وقرر يحط يافطه فى بالكونتهم مكتوب عليها :
(< راجل للبيع....... مين يشترى ؟>)
وتوته توته فرغت الحدوته ............................................!!!
يعنى ده النتيجه اللى وصلها سوبر مان ..... ما بالك بقى بينا احنا اللى مش نيجى حاجه فى سوبر مان هنعمل ايه ومستقبلنا هيكون شكله ايه ؟؟؟؟؟؟؟
والله انا بجد خايف انا او انت او اى حد فينا يوصل لنفس النتيجه ونقول :
راجل للبيع ................. مين يشترى ؟؟؟؟؟؟؟؟؟؟؟؟؟؟؟؟؟؟؟؟